Bloeityd midde-in die winter: Junie 2021

Bloeityd midde-in die winter

As daar een ding is wat die SBA saam met die wêreld die laaste 15 maande geleer het, is dit dat ‘n inperking in vlees soms die beste dryfveer kan wees vir ‘n nuwe bloeityd in die gees. Die wêreld moes noodgedwonge nuut dink om voort te gaan, maar anderkant bekommernis en vrees vir die onbekende, lê groei. Dit bly vir die SBA ‘n voorreg om op voetsoolvlak in gemeenskappe betrokke te kan raak en deel te wees van hierdie proses om gemeenskappe te verbind met nuwe geleenthede en om spore te trap waarin veral ons jeug met selfvertroue kan volg.

Een van die SBA se trotse toevoegings die afgelope maand, as deel van ‘n nuwe digitale fokus parallel aan veldwerk, is ‘n digitale leeshoekie by Artscape wat op 16 Junie geopen is en die genot van stories en kreatiewe ontwikkeling vir jong kinders op ‘n byderwetse wyse ontsluit.

Die bekendstelling van die digitale leeshoekie met SBA-kinderpublikasies ter viering van Jeugdag, is ook ‘n geskenk van die SBA aan Artscape aangesien dié instelling vanjaar hul 50ste bestaansjaar vier. Met die teater as ‘n kern waar stories lewe kry deur uitvoerende kuns, was dit vir die SBA net ‘n natuurlike uitvloeisel om ook hier ons bron van multitalige verhale met teatergangers te kan deel.

Drie kinderpublikasies van die SBA, Fatima, Robbie die Rowwe Rot en Die Kokerboom is in die leeshoekie beskikbaar vir besoekers.  Die publikasies is in elektroniese formaat op tablette gelaai en interaktiewe lees- en leermoontlikhede deur middel van ʼn spesiaal ontwerpte toepassing gee gebruikers toegang tot kreatiewe leergeleenthede en selfontdekking. Fatima en Die Kokerboom is ook inkleurboeke wat op die tablet ingekleur kan word.

Soos alle SBA-projekte, het ook hierdie inisiatief ‘n ingeboude gestremde fokus deurdat die toepassing met al die publikasies op ‘n braille touch plus-tablet by die leeshoekie beskikbaar is. Siggestremdes kan dus hierdie apparaat gebruik om al die funksies van die toep te benut. Verklankte weergawes van al die publikasies kan ook geniet word.

Die graad 3-klas van Karookop Primêr in die Bergrivier Munisipaliteit en ook leerders van Athlone Skool vir Blindes was op Jeugdag die eregaste by Artscape tydens die bekendstelling van die digitale leeshoekie.

Idiomekuns spreek boekdele

Gesels jy met enige taalonderwyser of taalliefhebber, is die onderrig van idiome en die bewaring van hierdie taalskatte vir die jonger geslagte ‘n uitdaging.

‘n Geleentheid om deur Afrikaans erkenning te gee aan die waarde van figuurlike taal oor taalgrense heen was vir die SBA die ideale kans om nuwe lewe te blaas in ons jongmense se belewenis van idiome.

‘n Lys van 22 isiXhosa-idiome rondom die tema van water was die vertrekpunt vir die SBA se idioomboek, Ons almal drink van dieselfde stroompie, waarvan 3 000 kopieë reeds in Februarie en Maart 2021 onder geselekteerde skole van die Kaap metro onderwysdistrik versprei is.

Die projek was ‘n gesamentlike viering van Internasionale Moedertaaldag (21 Februarie), Waterdag (22 Maart) en Kunsdag (15 April) deurdat leerders uitgenooi is om een van die idiome visueel voor te stel as deel van ‘n groter kunsuitstalling.

30 finaliste se voorstellings is gekeur om deel te vorm van die uitstalling wat vanaf 16 Junie tot Augustus oop is vir besigtiging deur die publiek by Artscape. Covid-19 het die bekendstellingsgeleentheid wat ook vir 16 Junie beoog was se tydlyn in ‘n ander rigting gedwing, maar ‘n viering van die gekose graad 8-leerders se kunswerke word beplan vir later vanjaar in die lente – heel gepas as ‘n blomproduk ná ‘n moeilike winter.

Klik hier en kyk op bl. 4 en 5 van ons nuusbrief in Mei na die 30 finaliste se visuele voorstellings van die idiome soos gevind in Ons almal drink van dieselfde stroompie.

Ons loer binnekort weer in om die werksaamhede in die SBA-blomtuin met julle te deel. Laat weet ons gerus ook waarmee jou gemeenskap besig is en deel inisiatiewe wat wys dat ons elkeen kan blom daar waar ons in die taaltuin geplant is. *Fotograaf: Natalie Gabriels